दोन ध्रुवांवर दोघे आपण तू तिकडे अन्‌ मी इकडे वाऱ्यावरती जशी चुकावी दोन पाखरे दोहिकडे   दिवस मनाला वैरि भासतो तारा मोजित रात गुजरितो युगसम वाटे घडीघडी ही कालगती का बंद पडे ?   वसंतासवे धरा नाचते तांडव भीषण मज ते गमते गजबजलेल्या जगात जगतो जीवन एकलकोंडे   नि:श्वसिते तव सांगायाला पश्चिमवारा बिलगे मजला शीतल कोमल तुझ्या करांचा सर्वांगी जणु स्पर्श घडे   स्मृति-पंखांनी भिरभिर फिरते प्रीतपाखरू तुझ्याच भवते मुक्या मनाचे दु:ख सागरा सांग गर्जुनी तू तिकडे   तोच असे मी, घर हे तेही तोच सखी, संसार असेही तुझ्यावाचुनी शून्य पसारा प्राण तिथे अन्‌ देह इथे     गीत - मा. ग. पातकर संगीत - गजानन वाटवे स्वर - गजानन वाटवे