जीव तुला लोभला माझ्यावरी रे शोभना या ऋणाची विस्मृती ती ना कधी होवो मना !   का मुळी कोणी करावे प्रेम एखाद्यावरी ? हे तुझे सौजन्य, पाणी आणिते या लोचना !   शक्तिच्या राज्यांत सक्ती शोभते, शोभो तिथे ! प्रीतिला स्वातंत्र्य आधी पाहिजे, का होय ना ?   आपुल्यामध्ये पडू दे शैलराजी सह्य ही भेटती दूरांतरे सप्रेम कृष्णा-कोयना !   चाललो एका दिशेने थोडके का हे असे ? सागरी एकाच भेटू अंतकाली मोहना !     गीत - माधव ज्यूलियन संगीत - गजानन वाटवे स्वर - गजानन वाटवे