अंध बिचारी मी जरी बाला पाहिले न कधी शशीसूर्याला वाण नसे परी आनंदाला कारण अंध अशि मी बाला ॥ कळ्या फुलांचा रंग तजेला कसा दिसावा अभागिनीला परी ते देती सुगंध मजला कारण अंध अशि मी बाला ॥ पक्षांच्या नभी उडत्या लीला कुठुन पहाणे या जन्माला मला ऐकविती परी गानाला कारण अंध अशि मी बाला ॥ प्रेमाचे मधुबोल हे जगीं देवाची अंधास देणगी सकल बोलती प्रेमळ बोला कारण अंध अशि मी बाला ॥     गीत - गोविंद सदाशिव टेंबे संगीत - गोविंदराव टेंबे स्वर - पं. कुमार गंधर्व नाटक - संगीत तुलसीदास (१९२८)