दाटून कंठ येतो ओठांत येइ गाणे जा आपुल्या घरी तू जा, लाडके, सुखाने ! हातात बाळपोथी ओठांत बाळ भाषा रमलो तुझ्यासवे मी गिरवीत श्रीगणेशा वळवून अक्षरांना केले तुला शहाणे जातो सुखावुनी मी या गोड आठवाने ! बोलांत बोबडीच्या संगीत जागवीले लयतालसूरलेणे सहजीच लेववीले एकेक सूर यावा नाहून अमृताने अवघ्याच जीवनाचे व्हावे सुरेल गाणे ! घेऊ कसा निरोप ? तुटतात आत धागे हा देह दूर जाता मन रहणार मागे ! धन आत्मजा दुजाचे ज्याचे तयास देणे परक्यापरी अता मी येथे फिरून येणे     गीत - शांता शेळके संगीत - अनिल-अरुण स्वर - पं. वसंतराव देशपांडे चित्रपट - अष्टविनायक (१९७९)