मधु मागसी माझ्या सख्या, परी मधुघटचि रिकामे पडती घरी ! आजवरी कमळाच्या द्रोणी मधु पाजिला तुला भरोनी, सेवा ही पुर्विची स्मरोनी, करी न रोष सख्या, दया करी. नैवेद्याची एकच वाटी, अता दुधाची माझ्या गाठी; देवपुजेस्तव ही कोरांटी बाळगी अंगणी कशी तरी. तरुण-तरुणिंची सलज्ज कुजबुज वृक्षझऱ्यांचे गूढ मधुर गुज संसाराचे मर्म हवे तुज मधु पिळण्या परि बळ न करी ! ढळला रे ढळला दिन सखया ! संध्याछाया भिवविति हृदया, आता मधुचे नाव कासया ? लागले नेत्र हे पैलतिरी.     गीत - भा. रा. तांबे संगीत - वसंत प्रभू स्वर - लता मंगेशकर राग - भीमपलास (नादवेध)