अगा करुणाकरा करितसे धांवा । या मज सोडवा लवकरी ॥१॥ ऐकोनियां माझी करुणेची वचने । व्हावें नारायणें उतावीळ ॥२॥ मागें पुढें अवघा दिसे रिता ठाव । ठेवूनि पायीं भाव वाट पाहें ॥३॥ उशीर तो आतां न पाहिजे केला । अहो जी विठ्ठला मायबापा ॥४॥ उरलें तें एक हेंचि मज आतां । अवघें विचारितां शून्य झालें ॥५॥ तुका म्हणे आतां करीं कृपा दान । पाऊलें समान दावीं डोळा ॥६॥     रचना - संत तुकाराम संगीत - श्रीनिवास खळे स्वर - लता मंगेशकर राग - तोडी (नादवेध)