नवलाख तळपती दीप विजेचे येथ उतरली तारकादळे जणू नगरात परि स्मरते आणिक करते व्याकुल केव्हा त्या माजघरातिल मंद दिव्याची वात ! वाऱ्यावर येथिल रातराणि ही धुंद टाकता उसासे, चरणचाल हो मंद परि स्मरतो आणिक करतो व्याकुल केव्हा त्या परसामधला एकच तो निशिगंध ! हेलावे भवती सागर येथ अफाट तीरावर श्रीमान इमारतींचा थाट परि स्मरतो आणिक करतो व्याकुल केव्हा तो नदीकिनारा आणि भंगला घाट ! बेहोष चढे जलशांना येथिल रंग रुणझुणता नूपुर जीव बने निःसंग परि स्मरतो आणिक करतो व्याकुल केव्हा तो आर्त मला जो ऐकविलास अभंग ! लावण्यवतींचा लालस येथे विलास मदिरेत माणकापरी तरारे फेस परि स्मरती आणिक करती व्याकुल केव्हा ते उदास डोळे, त्यातिल करुण-विलास !     गीत - कुसुमाग्रज संगीत - गजानन वाटवे स्वर - ???