A Non-Profit Non-Commercial Public Service Initiative by Alka Vibhas   
आला किनारा आला किनारा

आला किनारा !
निनादे नभीं नाविकांनो इशारा
आला किनारा !

उद्दाम दर्यामधें वादळी
जहाजें शिडावून हीं घातलीं
जुमानीत ना पामरांचा हकारा
आला किनारा !

प्रकाशे दिव्यांची पहा माळ ती
शलाका निळ्यालाल हिंदोळती
तमाला जणू अग्‍निचा ये फुलोरा
आला किनारा !

जयांनीं दलें येथ हाकारलीं
क्षणासाठिं या जीवनें जाळलीं
सुखेनैव स्वीकारुनी शूल-कारा-
आला किनारा !

तयांच्या स्मृती गौरवें वन्‍दुनी
उभे अंतिंच्या संगरा राहुनी
किनार्‍यास झेंडे जयाचे उभारा
आला किनारा !
गीत - कुसुमाग्रज
संगीत - गिरीश जोशी
स्वर- पद्मजा फेणाणी-जोगळेकर
अल्बम - रंग बावरा श्रावण
गीत प्रकार - स्फूर्ती गीत
  
टीप -
• काव्य रचना- १९४६.
कारा - कारावास.
तम - अंधकार.
शूल (सूळ, शूळ) - वेदना / सूळ. अपराध्यास शासन करण्यासाठी उभा केलेला तीक्ष्ण टोकाचा लोखंडाचा स्तंभ.
शलाका - काठी, काडी.
सुखेनैव - सहज.
संगर - युद्ध.
हिंदोल (हिंडोल) - झुला, झोका.

Please consider the environment before printing.
कागद वाचवा.
कृपया पर्यावरणाचा विचार करा.


Random song suggestion
  पद्मजा फेणाणी-जोगळेकर