A Non-Profit Non-Commercial Public Service Initiative by Alka Vibhas   
आता कसली चोरी ग

त्याची माझी प्रीत अलौकिक, दिशा जाणती चारी ग
आता कसली चोरी ग !

तो नगरीचा झाला राजा
मी म्हणते पण केवळ माझा
त्याच्या भवती धरिती फेरा, स्वप्‍ने माझी सारी ग
आता कसली चोरी ग !

फुलात दिसती त्याचे डोळे
सुगंधात सहवास दरवळे
स्मरणे त्याच्या घेई लालिमा, कांती माझी गोरी ग
आता कसली चोरी ग !

वावरता मी त्याच्या मागे
पदापदावर सुदैव जागे
सप्तपदीला विलंब का मग तोरण विलसो दारी ग
आता कसली चोरी ग !
गीत - ग. दि. माडगूळकर
संगीत - सुधीर फडके
स्वर- आशा भोसले
चित्रपट - देवमाणूस
गीत प्रकार - चित्रगीत

Please consider the environment before printing.
कागद वाचवा.
कृपया पर्यावरणाचा विचार करा.