A Non-Profit Non-Commercial Public Service Initiative by Alka Vibhas   
क्षितिजीं आलें भरतें ग

गडद निळे गडद निळे जलद भरुनि आले
शीतलतनु चपलचरण अनिलगण निघाले

क्षितिजीं आलें भरतें ग
घनांत कुंकुंम खिरतें ग
झालें अंबर
झुलतें झुंबर
हवेंत अत्तर तरतें ग

लाजण झाली धरती ग
साजण कांठावरतीं ग
उन्हांत पान
मनांत गान
ओलावुन थरथरतें ग

नातें अपुलें न्हातें ग
हो‍उनि ऋतुरस गातें ग
तृणांत मोती
जळांत ज्योती
लावित आलें परतें ग.

सरिंवर सरी आल्या ग
सचैल गोपी न्हाल्या ग.
गीत - बा. भ. बोरकर
संगीत - श्रीधर फडके
स्वर- पद्मजा फेणाणी-जोगळेकर
गीत प्रकार - ऋतू बरवा, भावगीत
  
टीप -
• काव्य रचना- ४ ऑक्‍टोबर १९५९.
अनिल - वायु, वारा.
खिरते - गळते, पाझरते.
परते - परत / पलीकडे.
सचैल - अंगावरील वस्‍त्रसुद्धा.

Please consider the environment before printing.
कागद वाचवा.
कृपया पर्यावरणाचा विचार करा.