A Non-Profit Non-Commercial Public Service Initiative by Alka Vibhas   
कुबेराचं धन माझ्या शेतात

देवावाणी शेत माझं नवसाला पावलं
कुबेराचं धन माझ्या शेतात घावलं

झाकली मूठ ही मिरगानं फेकली
निढळाची धार ती सर्गानी शिंपली
बाळरूप कोवळं शिवारात हासलं
धरतीच्या माउलीनं दिनरात पोसलं

तरारुन आला भरा, गहू हरभरा
शाळूराजा डुलतोय झुलवीत तुरा
तरुणपण जवारीनं पानाआड झाकलं
चोच मारून पाखरू पिकामधी लपलं
कुबेराचं धन माझ्या शेतात घावलं

मोटेवरी रंगली ढंगदार लावणी
घुमवीत गोफणी सुरू झाली राखणी
लक्ष्मी ही देखणी रूप तिनं दावलं
दिवसाच्या डोळियांत नाही बघा मावलं
कुबेराचं धन माझ्या शेतात घावलं
गोफण - शेतातील धान्यावरील पक्षी उडवण्यासाठी दगड मारताना वापरावयाचे उपकरण.
मोट - विहिरीतून पाणी काढण्याचे मोठे पात्र.
शाळू - जोंधळ्याची एक जात. हा हिवाळ्याच्या दिवसांत पिकतो.

Please consider the environment before printing.
कागद वाचवा.
कृपया पर्यावरणाचा विचार करा.


Random song suggestion
  उषा मंगेशकर, पं. हृदयनाथ मंगेशकर