A Non-Profit Non-Commercial Public Service Initiative by Alka Vibhas   
रसिका तुझ्याचसाठी

रसिका तुझ्याचसाठी मी एक गीत गाते
हृदयात दाटलेली भावांजली वहाते

आले दुरुनी येथे घेउनी सूर कंठी
जणू विठ्ठलाघरी ये दिंडीच वाळवंटी
रसिकांत देव माझा दिनरात मी पहाते

माझी फुले सुरांची मधुबोल गंध देती
आलाप छंद घेता निमिषात धुंद होती
बांधोनि भावपूजा मी भाग्यवंत होते

जनमानसांत देवा दिसशी समोर जेव्हा
हृदयात दाटुनी ये आनंदपूर तेव्हा
शतजन्म हेच राहो अपुले अभंग नाते
निमिष - पापणी लवण्यास लागणारा काळ.

Please consider the environment before printing.
कागद वाचवा.
कृपया पर्यावरणाचा विचार करा.