मागे उभा मंगेश, पुढे उभा मंगेश
माझ्याकडे देव माझा पाहतो आहे !

जटाजूट माथ्यावरी
चंद्रकला शिरी धरी
सर्पमाळ रुळे उरी
चिताभस्म सर्वांगास लिंपुन राहे
माझ्याकडे देव माझा पाहतो आहे !

जन्मजन्मांचा हा योगी
संसारी आनंद भोगी
विरागी, की म्हणू भोगी ?
शैलसुता संगे, गंगा मस्तकी वाहे
माझ्याकडे देव माझा पाहतो आहे !

गीत	-	शान्‍ता शेळके
संगीत	-	पं. हृदयनाथ मंगेशकर
स्वर	-	आशा भोसले
चित्रपट	-	महानंदा (१९८४)
राग	-	यमनकल्याण
		(चित्रपटातील स्वराविष्कार - आशा भोसले, उषा मंगेशकर, राणी वर्मा, रंजना जोगळेकर )