​नाही गडे कुणाशी माझे जगात नाते
पाऊलवाट माझी दारी तुझ्याच येते !
नाही म्हणू नको ग, उघडी सखी कवाडा

दारी उभा कधीचा मी एक प्रेमवेडा !

झिडकारिले कितीदा पीडा फिरून आली
माझा गुन्हा असे हा, फिर्याद मीच केली
कर न्यायदेवते तू येऊनिया निवाडा !

बंधाविना सुटेना ही खोड जन्मजात
भोगीन मी सजा ती तव दृष्टिच्या गजांत
होता सजा हवी ती, हा संपला बखेडा !

दावी दया जराशी, मजसी कधी न सोडी
घालून ठेव पायी भरघोस लग्‍नबेडी
आणि पुन्हा कधी तू उघडू नको कवाडा !