A Non-Profit Non-Commercial Public Service Initiative by Alka Vibhas   
बाळा जो जो रे

बाळा जो जो रे
पापणिच्या पंखांत झोपु दे डोळ्यांची पांखरे!

झोपी गेल्या चिमण्या-राघू
चिमण्या राजा नकोस जागू
हिरव्या पानावरी झोपली वेलींची लेकरे!

पुरे खेळणे आता बाळा
थांबव चाळा, थांबव वाळा
वनदेवींनी उघडी केली स्वप्‍नांची मंदिरे!

मेघ पांढरे उशास घेउनि
चंद्र-तारका निजल्या गगनी
शब्द ऐकते झोपेमधुनी चावळते वारे!
घुंगुरवाळा - घुंगरे लावलेला लहान मुलाच्या पायांतला पैंजण.
चावळणे - बरळणे.