गीत क्रमांक- ३६
( ७ जुलै २०२२ )

जात कोणती पुसू नका
धर्म कोणता पुसू नका
उद्यानातिल फुलांस त्यांचा रंग कोणता पुसू नका
   रहिम दयाळू तसाच राम
   मशीद मंदिर मंगलधाम
   जपुनी शांतीचा मंत्र मुखाने एक दुज्याला डसू नका
   जन्मा आलो मुले म्हणून
   भरतभूमीच्या कुशीमधून
   अभेद आम्ही अजिंक्य आम्ही, नाव आमुचे पुसू नका

- यशंवंत देव

गीत क्रमांक- ३५
( ६ जुलै २०२२ )

जाग जाग भारता ! काळ कठिण ये अता
शत्रुसैन्य पातले खड्ग उचल स्वागता
   कोटी देह एक प्राण, एक लक्ष्य एक आण
   मायभूस वाचवू ना विचार अन्यथा
   वागवी अता तरी, बोध एक अंतरी
   ध्येय शांतीचे तरी रक्ष रक्ष वीरता

- यशवंत देव

गीत क्रमांक- ३४
( ५ जुलै २०२२ )

भारत अमुचा देश, भारत अमुचा देव
'भारत अमुचा सत्यधर्म' हा मंत्र जपू हा एक
भारतीय मी आहे आधी, आपण सारे एक
   प्रांत देश या पुढेही जाऊ, पुजु या मानवतेला
   मित्र जगाचे सार्‍या होऊ, मित्र करूया त्याला
   सत्य अहिंसा शांती यांचा संगम साधु सुरेख

- विनायक रहातेकर

गीत क्रमांक- ३३
( ४ जुलै २०२२ )

तू नव्या जगाची आशा
जय जय हे भारत देशा !
   तपोवनातून तुझ्या उजळली उपनिषदांची वाणी
   मातीमधुनी तुझ्या जन्मल्या नररत्‍नांच्या खाणी
   जय युगधैर्याच्या देशा
   जय नवसूर्याच्या देशा

- मंगेश पाडगांकर

गीत क्रमांक- ३२
( ३ जुलै २०२२ )

आज पेटली उत्तर सीमा, रणांगणाचे आमंत्रण
सह्याद्रीच्या रणरूद्रा तुज हिमालयाचे हे आवाहन
   मंगलतेचा गड रक्षाया आज करा रक्ताचे सींचन
   जागृत होई मराठदेशा, रणचंडी कर तांडव नर्तन

- चकोर आजगांवकर

गीत क्रमांक- ३१
( २ जुलै २०२२ )

भारतमाता माझी लावण्याची खाण
गाइन तिचे गान, मी गाइन तिचे गान
   सर्वस्वाचे दान करिन मी, सर्वस्वाचे दान
   घेतो आज मी आण, घेतो घोर मी आण
   मातेला घडविन माझ्या मोक्ष-अमृतपान

- साने गुरुजी

गीत क्रमांक- ३०
( १ जुलै २०२२ )

पहा टाकले पुसुनी डोळे गिळला मी हुंदका
रणांगणी जा सुखे राजसा परतुन पाहू नका !
   या देशाची पवित्र माती
   इथे वीरवर जन्मा येती
   तोच वारसा तुम्ही पोचवा येणार्‍या शतका !

- शान्‍ता शेळके

गीत क्रमांक- २९
( ३० जून २०२२ )

उल्हासाचे रंग भरले नभांतरी दशदिशांतरी
   नवकिरणांचे दूत निघाले पूर्व दिशेहुन नाचत नाचत
   नवीन गाणी ओठावरती किलबिलते पक्ष्यांची पंगत
   सोनेरी स्वप्‍नांची झालर पहाटवार्‍यावरती विहरत
   नवी चेतना भरून घ्यावी ज्याने त्याने हृदयागारी
मनामनांच्या तारा जुळतिल, विश्वासाची गाणी फुलतिल
सहयोगाची ध्वजा फडकता प्रगतीची वाजेल तुतारी

- यशवंत देव

गीत क्रमांक- २८
( २९ जून २०२२ )

आनंदकंद ऐसा । हा हिंददेश माझा ॥
   सत्यास ठाव देई । वृत्तीस ठेवि न्यायी ।
   सत्यासि मानि राजा । हा हिंददेश माझा ॥
   पूजोनि त्यास जीवें । वंदोनि प्रेमभावें ।
   जयनाद हाचि गर्जा । हा हिंददेश माझा ॥

- आनंदराव टेकाडे

गीत क्रमांक- २७
( २८ जून २०२२ )

शूर आम्ही सरदार आम्हाला काय कुणाची भीती?
देव, देश अन्‌ धर्मापायी प्राण घेतलं हाती !
   जिंकावे वा कटुन मरावं हेच आम्हाला ठावं
   लढुन मरावं, मरून जगावं हेच आम्हाला ठावं
   देशापायी सारी विसरू माया-ममता-नाती !

- शान्‍ता शेळके

गीत क्रमांक- २६
( २७ जून २०२२ )

झुंजता रणभूवरी तू, अमर होशी रे सुता
भाग्य माझे थोर म्हणुनी जाहलो तव मी पिता
   हे खुळे वात्सल्य माझे ढाळिते अश्रू जरी
   ताठ माझी मान गर्वे, धन्यता दाटे उरी
   आजवर आशीष दिधले वंदना घेई आता

- सुरेश देशपांडे

गीत क्रमांक- २५
( २६ जून २०२२ )

उत्तुंग आमुची उत्तर सीमा इंच इंच लढवू
अभिमान धरू, बलिदान करू, ध्वज उंच उंच चढवू
   जरि हजार अमुच्या जाती
   संकटामधे विरघळती
   परचक्र येतसे जेव्हा
   चौदांची एकच जिव्हा
   मग पक्ष पंथ मतभेद आमुचे सागरात बुडवू

- वसंत बापट

गीत क्रमांक- २४
( २५ जून २०२२ )

या कळ्यांनो या फुलांनो, या मुलांनो या जरा
मंत्र 'वंदे मातरम्‌' हा घोष गर्जा अंबरा !
   आणिले स्वातंत्र्य आम्ही झुंजुनी शत्रूसवे
   हाती तुमच्या देतसे ते शुभ नव्या भाग्यासवे
   रक्षणे स्वातंत्र्य आता कार्य हे इतुके करा
   मंत्र 'वंदे मातरम्‌' हा घोष गर्जा अंबरा !

- मधुकर जोशी

गीत क्रमांक- २३
( २४ जून २०२२ )

सुटला वादळी वारा !
वल्हव जोमात जरा, गाठू किनारा,
गड्या गाठू किनारा, गड्या गाठू किनारा रे
   उजविला महागाई-बेकारीचं कडं, बसंल धडक
   हेरून ठेव पर माराया धडक, फोडाया खडक
   एकीचा दीप कुठं दिसतोय का हुडक, वल्हव तडक
   तिकडं बी पाऊस-गारा, जणू मशीनगनचाच मारा
   झुंजु गाठू किनारा, गड्या गाठू किनारा
   गड्या गाठू किनारा, गड्या गाठू किनारा रे

- शाहीर अमर शेख

गीत क्रमांक- २२
( २३ जून २०२२ )

उद्योगाचे घरी देवता लक्ष्मी वास करी
जय श्रमदेवी, जय श्रमदेवी, जय श्रमदेवी कृपा करी
   दुर्दैवाचे पहाड फोडू
   अमोल दौलत खणुनी काढू
   मातीमधुनी सोने लपले, धरणीच्या उदरी

- जगदीश खेबूडकर

गीत क्रमांक- २१
( २२ जून २०२२ )

पाटीवरती गिरवा अक्षर, अक्षर जोडून शब्‍द करा
अपुले वैभव अपुल्या हाती, हाच आजचा मंत्र खरा
एक अक्षरा अर्थ नसे रे, अनेक मिळुनी अर्थ कळे
एक एकटा मागे पडतो, एकजुटीने सर्व मिळे
शिकेल त्याच्या हाती उद्याचे नवीन जीवन घडे
चला जाऊया पुढे !

- जयंत मराठे

गीत क्रमांक- २०
( २१ जून २०२२ )

दिव्यत्वाची जेथ प्रतीती
तेथें कर माझे जुळती.
   यज्ञीं ज्यांनी देउनि निजशिर
   घडिलें मानवतेचें मंदिर
   परि जयांच्या दहनभूमिवर
   नाहिं चिरा नाहीं पणती-
   तेथें कर माझे जुळती.

- बा. भ. बोरकर

गीत क्रमांक- १९
( २० जून २०२२ )

भारतीय नागरिकाचा घास रोज अडतो ओठी
सैनिक हो तुमच्यासाठी
   रक्षिता तुम्ही स्वातंत्र्या प्राणास घेउनी हाती
   तुमच्यास्तव आमुची लक्ष्मी, तुमच्यास्तव शेतीभाती
   एकट्या शिपायासाठी झुरतात अंतरे कोटी
सैनिक हो तुमच्यासाठी

- ग. दि. माडगूळकर

गीत क्रमांक- १८
( १९ जून २०२२ )

जीवन त्यांना कळलें हो
मीपण ज्यांचें पक्व फळापरी सहजपणाने गळलें हो
   सिंधूसम हृदयांत जयांच्या रस सगळे आकळले हो
   आपत्कालीं अन्‌ दीनांवर घन हो‍उनि जे वळले हो
   जीवन त्यांना कळलें हो

- बा. भ. बोरकर

गीत क्रमांक- १७
( १८ जून २०२२ )

रक्तकणांनी रेखांकित ही शपथ हुतात्मा वीरांची
यश-दीप्ती-सन्‍मान वाढवा, कीर्ती वाढवा देशाची
   समान येथे सारे मानव, धर्म-जातीचा भेद नसो
   समान संधी समान निर्णय, न्यायप्रीयता पूर्ण वसो
   वैभव माना भिन्‍न वेष हे, विभिन्‍न भाषा प्रांतांची

- जयंत तारे

गीत क्रमांक- १६
( १७ जून २०२२ )

वायुपुत्र होउनी धरू मुठीत भास्करा
होउनी अगस्तीही पिऊन टाकू सागरा
रामकृष्ण होऊया, समर्थ होऊया चला
उठा उठा, चला चला
   उठा राष्ट्रवीर हो
   सज्ज व्हा उठा चला, सशस्‍त्र व्हा उठा चला
   उठा राष्ट्रवीर हो

- रवीन्‍द्र भट

गीत क्रमांक- १५
( १६ जून २०२२ )

तुला वंदितो आज चैतन्यशक्ती, उफाळून ये रोज सर्वांतरी
तुझ्या प्रेरणेने घडो राष्ट्र माझे जगी दिव्य तेजाळ सूर्यापरी !
   वसे थोर सामर्थ्य बाहूत ज्यांच्या गळां माळ त्यांच्या यशाची पडे
   शुरांच्या मुखी शोभते योग्य भाषा जना द्यावया शांततेचे धडे
   अशांना मिळे हो सलामी जगाची दरारा तयांचा दिसे संगरी

- गुरुनाथ शेणई

गीत क्रमांक- १४
( १५ जून २०२२ )

मज नकोत अश्रू घाम हवा
हा नव्या युगाचा मंत्र नवा !
   होते तैसी अजून उते मी
   सधन अन्‍नदा सुवर्णभूमी
   खंडतुल्य या माझ्या धामी
   का बुभुक्षितांचा रडे थवा?

- ग. दि. माडगूळकर

गीत क्रमांक- १३
( १४ जून २०२२ )

हे राष्ट्ररूपिणी गंगे ! घेईं नमस्कार माझा.
   स्वातंत्र्याचें दान कुणा कधिं मागुनि कुणि दिधलें?
   याचक वृत्ती सोड सोड ही- कुणीं तुला हें कथिलें?
   ध्यानिं आण सामर्थ्य आपुलें स्वयंप्रकाशिनि गंगे !
   स्वतंत्रता मिळविण्या समर्था तुझी तूंच अभंगे.

- आनंदराव टेकाडे

गीत क्रमांक- १२
( १३ जून २०२२ )

या लाडक्या मुलांनो तुम्ही मला आधार
नवहिंदवी युगाचे तुम्हीच शिल्पकार
   शाळेत रोज जाता ते ज्ञानबिंदू मिळवा
   हृदयात आपुल्या त्या देशाभिमान ठेवा
   कुलशील छान राखा ठेवू नका विकार

- मधुकर जोशी

गीत क्रमांक- ११
( १२ जून २०२२ )

जयतु शौर्यशालिनी, जयतु पुण्यदायिनी
जयतु जयतु जयतु जगति भरतभूमि मानिनी
   रक्त जोवरी नसांत, प्राण जोवरी उरात
   भावशक्ति माणसात प्राणदेह पंजरात
   मायभूमी रक्षणार्थ झुंज धुंद संगरात
   या आशा उफाळतात लाख उर्मी अंतरात
   धडकली पुरी बिनी भडकल्या कडाबीनी
   जयतु जयतु जयतु जगति भरतभूमि मानिनी

- वसंत बापट

गीत क्रमांक- १०
( ११ जून २०२२ )

बर्फाचे तट पेटुनी उठले सदन शिवाचे कोसळते
रक्त आपुल्या प्रिय आईचे शुभ्र हिमावर ओघळते
   खडक काजळी घोटुनि तुमचे मनगट-बाहू घडलेले
   कडेकपारीमधील वणवे उरात तुमच्या दडलेले
   काबुल-कंदाहार पथावर डंके तुमचे झडलेले
   शिवतेजाची दीपमाळ पाठीशी अपुल्या पाजळते

- कुसुमाग्रज

गीत क्रमांक- ९
( १० जून २०२२ )

यश अंती लाभणार, सत्य हे
यावर अमुचा दृढ विश्वास
यश अंती लाभणार, सत्य हे !
   येईल भूवरी शांती
   यावर अमुचा दृढ विश्वास
   येईल भूवरी शांती, सत्य हे !

- यशवंत देव

गीत क्रमांक- ८
( ९ जून २०२२ )

माणुसकीच्या शत्रूसंगे युद्ध आमुचे सुरू
जिंकू किंवा मरू
   लढती सैनिक, लढू नागरिक
   लढतील महिला, लढतील बालक
   शर्थ लढ्याची करू

- ग. दि. माडगूळकर

गीत क्रमांक- ७
( ८ जून २०२२ )

"मेरी झांसी नही दूंगी" हे बोल जिथे घुमती
तिथे लवे ही मान हिंदवी गात तिची कीर्ती
   बीज मराठी, बाणा कणखर
   सत्तांधांशी देई टक्कर
   अजून दिसे पडक्या बुरुजावर
   उभी ठाकली मर्दानी ती शुभ्रकमल मूर्ती

- वसंत कानेटकर

गीत क्रमांक- ६
( ७ जून २०२२ )

अनाम वीरा जिथें जाहला तुझा जीवनान्‍त
स्तंभ तिथें ना कुणी बांधला, पेटली ना वात !
   काळोखांतुनि विजयाचा ये पहाटचा तारा
   प्रणाम माझा पहिला तुजला मृत्युंजय वीरा !!

- कुसुमाग्रज

गीत क्रमांक- ५
( ६ जून २०२२ )

या भारतात बंधुभाव नित्य वसू दे
दे वरचि असा दे
हे सर्व पंथ, संप्रदाय एक दिसू दे
मतभेद नसू दे
उद्योगी तरुण वीर शीलवान दिसू दे
दे वरचि असा दे

- राष्ट्रसंत तुकडोजी महाराज

गीत क्रमांक- ४
( ५ जून २०२२ )

बलसागर भारत होवो, विश्वात शोभुनी राहो !
   वैभवी देश चढवीन, सर्वस्व त्यास अर्पीन
   तिमिर घोर संहारिन, या बंधु सहाय्याला हो !
   करि दिव्य पताका घेऊ, प्रिय भारतगीते गाऊ
   विश्वास पराक्रम दावू, ही माय निजपदा लाहो

- साने गुरुजी

गीत क्रमांक- ३
( ४ जून २०२२ )

सदैव सैनिका पुढेच जायचे
न मागुती तुवा कधी फिरायचे !
   नभात सैनिका प्रभात येउ दे
   खगांसवे जगा सुखात गाउ दे
   फुलाफुलांवरी सुवर्ण शोभु दे
   जगास शांतता सुहास्य लाभु दे
   न पाय तोवरी तुझे ठरायचे !
सदैव सैनिका पुढेच जायचे

- वसंत बापट

गीत क्रमांक- २
( ३ जून २०२२ )

ध्वज अशरण हा
ध्वज अमरण हा
ध्वज अविरत हा फडकेल !
   वीरांच्या रुधिरांत भिजे हा
   संतांच्या श्रद्धेत रूजे हा
   त्रिवर्ण हा निर्भय नीलांतुन
   जीवन नव बरसेल !
ध्वज अविरत हा फडकेल !

- कुसुमाग्रज

गीत क्रमांक- १
( २ जून २०२२ )

वेदमंत्रांहून आम्हा वंद्य 'वंदे मातरम्‌' !
वंद्य वंदे मातरम्‌
   निर्मिला हा मंत्र ज्यांनी आचरीला झुंजुनी
   ते हुतात्मे देव झाले स्वर्गलोकी जाउनी
   गा तयांच्या आरतीचे गीत 'वंदे मातरम्‌' !

- ग. दि. माडगूळकर