उत्तुंग आमुची उत्तर सीमा इंच इंच लढवू
अभिमान धरू, बलिदान करू, ध्वज उंच उंच चढवू

परक्यांचा येता हल्ला
प्रत्येक घर बने किल्ला
हे कोटि कोटि भुजदंड
होतील इथे ध्वजदंड
छातीची करुनी ढाल, लाल त्या संगिनीस भिडवू

बलवंत उभा हिमवंत
करी हैवानांचा अंत
हा धवलगिरी, हा नंगा
हा त्रिशूळ कांचनगंगा
जरि झुंड पुंड शत्रूंची आली, खिंड खिंड अडवू

जरि हजार अमुच्या जाती
संकटामधे विरघळती
परचक्र येतसे जेव्हा
चौदांची एकच जिव्हा
मग पक्ष पंथ मतभेद आमुचे सागरात बुडवू

अन्याय घडो शेजारी
की दुनियेच्या बाजारी
धावून तिथेही जाऊ
स्वातंत्र्य-मंत्र हा गाऊ
आम्ही न कुणाचे दास, नवा इतिहास पुन्हा घडवू

राष्ट्राचा दृढ निर्धार
करू प्राणपणे प्रतिकार
ह्या नसानसांतील रक्त
जाळील आसुरी तख्त
स्वातंत्र्य-बंधुता-समता यांचा घोष सदा घुमवू