A Non-Profit Non-Commercial Public Service Initiative by Alka Vibhas   
अनाम वीरा जिथें जाहला

अनाम वीरा जिथें जाहला तुझा जीवनान्‍त
स्तंभ तिथें ना कुणी बांधला, पेटली ना वात !

धगधगतां समराच्या ज्वाला या देशाकाशीं
जळावयास्तव संसारातुन उठोनिया जाशी !

मूकपणानें तमीं लोपती संध्येच्या रेषा
मरणामध्यें विलीन होसी, ना भय ना आशा !

जनभक्तीचे तुझ्यावरी नच उधाणले भाव
रियासतीवर नसे नोंदलें कुणी तुझें नांव !

जरी न गातिल भाट डफावर तुझें यशोगान !
सफल जाहलें तुझेंच हें रे तुझेंच बलिदान !

काळोखांतुनि विजयाचा ये पहाटचा तारा
प्रणाम माझा पहिला तुजला मृत्युंजय वीरा !
गीत - कुसुमाग्रज
संगीत - वसंत प्रभु
स्वर- लता मंगेशकर
राग - यमन
गीत प्रकार - स्फूर्ती गीत
  
टीप -
• काव्य रचना- १९४७.
देशाकाशी - देश + आकाशी.
भाट - स्तुतिपाठक.
रियासत - देश.