A Non-Profit Non-Commercial Public Service Initiative by Alka Vibhas   
आनंदकंद ऐसा

आनंदकंद ऐसा । हा हिंददेश माझा ॥

सत्यास ठाव देई । वृत्तीस ठेवि न्यायी ।
सत्यास मानि राजा । हा हिंददेश माझा ॥

जगदीश जन्म घेई । पदवीस थोर नेई ।
चढवी स्वधर्मसाजा । हा हिंददेश माझा ॥

जनकादि राजयोगी । शुक वामदेव त्यागी ।
घुमवीति कीर्तीवाजा । हा हिंददेश माझा ॥

गंगा हिमाचलाची । वसती जिथें सदाची ।
होऊनि राहि कलिजा । हा हिंददेश माझा ॥

पृथुराज सिंह शिवजी । स्वातंत्र्यवीर गाजी ।
करिती रणांत मौजा । हा हिंददेश माझा ॥

तिलकादि जीव देहीं । प्रसवूनि धन्य होई ।
मरती स्वलोककाजा । हा हिंददेश माझा ॥

जगिं त्याविना कुणीही । स्मरणीय अन्य नाहीं ।
थोरांत थोर समजा । हा हिंददेश माझा ॥

पूजोनि त्यास जीवें । वंदोनि प्रेमभावें ।
जयनाद हाचि गर्जा । हा हिंददेश माझा ॥
गीत- आनंदराव टेकाडे
संगीत - श्रीधर फडके
स्वराविष्कार - श्रीधर फडके
आकाशवाणी गायकवृंद
( गायकांची नावे कुठल्याही विशिष्ट क्रमाने दिलेली नाहीत. )
गीत प्रकार - स्फूर्ती गीत
  
टीप -
• स्वर- श्रीधर फडके, संगीत- श्रीधर फडके.
• स्वर- आकाशवाणी गायकवृंद, संगीत- ???.
आनंदकंद - आनंदाचा उगम.
काज - काम.
वामदेव - एक महान तत्त्वेत्ता कवी.
शुक - शुक्राचार्य, व्यासपुत्र. हा जन्मत: तत्त्वज्ञानी व आजन्म ब्रह्मचारी होता.

 

  श्रीधर फडके
  आकाशवाणी गायकवृंद