उल्हासाचे रंग भरले नभांतरीं दशदिशांतरीं

नवकिरणांचे दूत निघाले पूर्व दिशेहुन नाचतनाचत
नवीन गाणी ओठावरती किलबिलते पक्ष्यांची पंगत
सोनेरी स्वप्‍नांची झालर पहाटवार्‍यावरती विहरत
नवी चेतना भरून घ्यावी ज्याने त्याने हृदयागारीं

दुथडी भरुनी प्रकाशगंगा गिरिराजीतुन येते आहे
उज्‍जवलतेचा कलश उरावर मिरवित मिरवित येते आहे
हळूहळू तिमिराची वाळू अपुल्या उदरीं गिळते आहे
न्‍हातिल पानें, हिरवी रानें, न्‍हाउन घेतिल कडेकपारी

मतभेदांच्या पाडुन भिंती प्रेमाचे घर उभे करूया
स्‍नेहसुमांच्या गुंफुन माळा हृदयाची दारे सजवूया
मनामनांच्या तारा जुळतिल, विश्वासाची गाणी फुलतिल
सहयोगाची ध्वजा फडकतां प्रगतीची वाजेल तुतारी