​[ जाति-प्रणयप्रभा. मिश्र पहाडी- त्रिताल. ]

​तेथे कर माझे जुळती
​दिव्यत्वाची जेथ प्रतीती.
हृन्‍मंदिरं 'संसृतिशरस्वागत
हसतचि करिती कुटुंब-हितरत
गृहस्थ जे हरि उरांत रिझवित
सदनी फुलबागा रचिती-
तेथे कर माझे जुळती.

ज्या प्रबला निज भावबलाने
करिती सदनें हरिहरभुवनें
देवपतींना वाहुनि सु-मनें
पाजुनि केशव वाढविती-
तेथे कर माझे जुळती.

​गाळुनियां भाळींचे मोती
हरीकृपेचे मळे उगविती
जलदांपरि येउनियां जाती
जग ज्यांची न करी गणती-
तेथे कर माझे जुळती.

शिरीं कुणाच्या कुवचनवृष्टी
वरती कुणि अव्याहत लाठी
धरिती कुणि घाणीची पाटी
जे नरवर इतरांसाठी-
तेथे कर माझे जुळती.

यज्ञीं ज्यांनी देउनि निजशिर
घडिलें मानवतेचें मंदिर
परी जयांच्या दहनभूमिवर
नाहिं चिरा नाहीं पणती-
तेथे कर माझे जुळती.

स्मितें जयांची चैतन्यफुलें
शब्द जयांचे नव दीप-कळे
कृतींत ज्यांच्या भविष्य उजळे
प्रेम-विवेकीं जे खुलती-
तेथे कर माझे जुळती.

​जिथें विपत्ती जाळी, उजळी
निसर्ग-लीला निळी काजळी
कथुनि कायसें काळिज निखळी
एकाची सगळी वसती-
तेथे कर माझे जुळती.

मध्यरात्रिं नभघुमटाखालीं
शांति शिरीं तम चंवर्‍या
ढाळी त्यक्त, बहिष्कृत मी
ज्या काळीं एकांती डोळे भरती-
तेथें कर माझे जुळती.

  संपूर्ण कविता / मूळ रचना