भारतीं सृष्टीचें सौंदर्य खेळे
दावीत सतत रूप आगळें

वसंत वनांत जनांत हासे
सृष्टीदेवी जणूं नाचे उल्हासें
गातात संगीत पृथ्वीचे भाट
चैत्रवैशाखाचा ऐसा हा थाट

ज्येष्ठ-आषाढांत मेघांची दाटी
कडाडे चपला होतसे वृष्टी
घालाया सृष्टीला मंगल स्‍नान
पूर अमृताचा सांडे वरून
गगनी नर्तन कृष्ण मेघांचें
भूतलीं मयूर उत्तान नाचे

श्रावणीं पाऊस हास्याचा पडे
श्रीकृष्णजन्माची दंगल उडे
बांधिती वृक्षांना रम्य हिंदोळे
कामिनी धरणी वैभवीं लोळे