A Non-Profit Non-Commercial Public Service Initiative by Alka Vibhas   
दिसते मजला सुखचित्र नवे

दिसते मजला सुखचित्र नवे
मी संसार माझा रेखिते !

प्रीत तुझीमाझी फुलावी या फुलत्या वेलीपरी
भाव मुके ओठांत यावे गंध जसा सुमनांतरी
शब्दाविना मनभावना अवघ्याच मी तुज सांगते !

हात तुझा हाती असावा साथ तुझी जन्मांतरी
मी तुझिया मागून यावे आस ही माझ्या उरी
तुजसंगती क्षण रंगती निमिषात मी युग पाहते !

स्वर्ग मिळे धरणीस जेथे रंग नवे गगनांगणी
सप्तसूरां लेवून यावी रागिणी अनुरागिणी
तुझियासवे सुखवैभवे सौभाग्य हे नित्‌ मागते !
गीत - शान्‍ता शेळके
संगीत - अनिल-अरुण
स्वर- अनुराधा पौडवाल
चित्रपट - अष्टविनायक
राग - पहाडी
गीत प्रकार - चित्रगीत
अनुराग - प्रेम, निष्ठा.
निमिष - पापणी लवण्यास लागणारा काळ.
सुमन - फूल.

 

Print option will come back soon