A Non-Profit Non-Commercial Public Service Initiative by Alka Vibhas   
गगना गंध आला

गगना गंध आला
मधुमास धुंद झाला
फुलले पलाश रानी
जळत्या ज्वाला
मधुमास धुंद झाला!

आले वनावनांत
सहकार मोहरून
भ्रमरास मंजिरीची
चाहूल ये दुरून
भरला मरंद कोषी,
भरला प्याला

वेलीस अंकुरांची
वलये किती सुरेख!
लिहितात अंगुलींनी
वार्‍यात प्रेमलेख
संदेश प्रेमिकांना
दुरुनी आला
गीत- शान्‍ता शेळके
संगीत - श्रीधर फडके
स्वराविष्कार - प्रभाकर कारेकर
श्रीकांत पारगांवकर
आरती अंकलीकर-टिकेकर
( गायकांची नावे कुठल्याही विशिष्ट क्रमाने दिलेली नाहीत. )
गीत प्रकार - भावगीत
अंगुली - बोट.
पळस - पलाश. 'पळस' या झाडाला वसंत ऋतुत लाल-केशरी रंगाची फुले येतात.
मंजिरी - मोहोर, तुरा.
मरंद (मकरंद) - फुलातील मध.

 

  प्रभाकर कारेकर
  श्रीकांत पारगांवकर
  आरती अंकलीकर-टिकेकर