A Non-Profit Non-Commercial Public Service Initiative by Alka Vibhas   
हा दैवगतीचा फेरा

ज्या झाडांनी दिली सावली, त्यांना नाही छाया
वात्‍सल्याच्या उन्हात जळते ओली ममता-माया

हा दैवगतीचा फेरा !
कलीयुगी या उलटा-सुलटा खेळ असे हा सारा

तळहाती जपले ज्याला, का भूल पडावी त्याला?
देव्हार्‍यातील दैवत घेई वळचणीस का थारा
खेळ असे हा सारा, हा दैवगतीचा फेरा !

कष्टाचे डोंगर पुढती ही गतजन्‍मीची झडती
शरीर थकले तरी शिरावर आयुष्याचा घारा
खेळ असे हा सारा, हा दैवगतीचा फेरा !

स्वप्‍नांना गहिवर फुटला की काळीज धागा तुटला
अमृत ज्यांनी दिले तयांच्या नयनी अश्रुधारा
खेळ असे हा सारा, हा दैवगतीचा फेरा !
वळचण - घर आणि पागोळ्या यांच्यातील मधली जागा.