A Non-Profit Non-Commercial Public Service Initiative by Alka Vibhas   
जादुगारिणी सखे साजणी

जादुगारिणी सखे साजणी
थांब जराशी ग

प्रेमभाव नजरेत दाविले
तूच आधी मज नादी लावले
गोड हसुनिया हृदयी फुलवल्या गुलाब-राशी ग

तुझ्या संगती गिरिकंदरही
राजमंदिराहुन सुखदायी
तू माझी तर तुच्छ अवांतर सौख्य-मिराशी ग

दोन जिवाचे जातक जुळले
भाग्यलेख प्रीतिने उजळले
जगास मानू उगा, जुमानू का ग्रहराशी ग

स्फूर्ति-तारका तू झगमगती
करू जोडीने प्रवास जगती
सदा बिलगली हीच एकली आस उराशी ग
गीत- स. अ. शुक्ल
संगीत - जी. एन्‌. जोशी
स्वर - जी. एन्‌. जोशी
गीत प्रकार - भावगीत
गिरिकंदर - डोंगरातली गुहा.
जातक - जन्‍मकाळाच्या ग्रहांच्या स्थितीवरून माणसाच्या आयुष्यात घडणार्‍या शुभाशुभ गोष्टींविषयीचे वर्णन करणारा ज्योतिषशास्‍त्राचा एक विषय.
मिराशी - वतनदार.