मैत्रिणींनो, थांबा थोडं खुशाल मागनं हसा !
चला विचारू या वेडीला संसार करशील कसा?

गोरीपान ही काया कवळी, ओल्या हळदीनं होईल पिवळी
लगीन होता सासरी जाता जीव होईल ग पीसा !
पी पी सनई, तडाम्‌ चौघडा, पंचकल्याणी येईल घोडा
त्यावर दोघं बसा !

नको करु लई नट्टापट्टा, दीर-नणंदा करतील थट्टा
सासूवरती तोंड टाकुनी बोलु नको वसवसा
शालू-चोळी दागदागिने भरताराला नको मागणं
मोकळा होईल खिसा !

नाद नसावा शेजारणीचा, मंतर देईल कानफुकीचा
मनोमनी ग पती पुजावा देवावाणी जसा !
दान-धर्माला म्होरं होऊन, कुणी भिकारी दारी पाहून
द्यावा ओंजळ पसा !

नव्या नवरीनं थोडं हसावं, सुगरणीवाणी काम दिसावं
घरंदाज या कुलशीलाचा वटीत घे ग वसा !