आली आली सुगी, म्हणून चालले बिगीबिगी
गोष्ट न्हाइ सांगण्याजोगी
कुणी गालावर मारली टिचकी
मला लागली कुणाची उचकी

कुणाची ग कुणाची? ह्याची का त्याची? लाजू नको, लाजू नको

तरणीताठी, नार शेलाटी, चढले मी बांधावर
अटकर बांधा, गोरा गोरा खांदा, पदर वार्‍यावर
फडामध्ये चाहूल, वाजलं त्याचं पाऊल
माझ्या उरात भरली धडकी

निजले डाव्या कुशी, हाताची उशी, करुन मी कशी
वार्‍याच्या लाटा, थंडीचा काटा, मनात न्यारी खुशी
सपनात आला, त्यानं छेडलं बाई मला
त्याच्या डोळ्याची नजर तिरकी

उठून सकाळी, ल‍इ येरवाळी, गेले पाणोठ्यावरी
उन्हात बसले न्हात, अंगाला पानी गुदगुल्या करी
पाण्यामध्ये दिसं, त्याचं लागलं मला पिसं
त्यानं माझीच घेतली फिरकी

रातदिस जागते, वाट त्याची बघते, किती मी घालू साद
झोप माझी उडली, जादू कशी घडली, जाई ना त्याची याद
भेटीसाठी आले, मनी कासाविस झाले मी, माझी मलाच झाले परकी