A Non-Profit Non-Commercial Public Service Initiative by Alka Vibhas   
पाऊस आला वारा आला

पाऊस आला वारा आला
पान लागले नाचू
थेंब टपोरे गोरे गोरे
भरभर गारा वेचू !

गरगर गिरकी घेते झाड
धडधड वाजे दार कवाड
अंगणातही बघता बघता
पाणी लागे साचू !

अंगे झाली ओलीचिंब
झुलू लागला दारी लिंब
ओली नक्षी पाऊसपक्षी
कुणी पाहतो वाचू !

ओसरुनी सर गेली रे
उन्हे ढगांतुन आली रे
इंद्रधनुष्यामध्ये झळकती
हिरे माणके पाचू !
कवाड - दरवाजाची फळी, दरवाजा.
पाचू (पाच) - एक प्रकारचे रत्‍न.