मायबाप.. मायबाप..

माणूस होऊन जगणे थोडे जगून पहा
देवपणा तू सोडून खाली उतर जरा
मायबाप.. मायबाप..

तू नसल्याचा भास पसरला चहुकडे
दगडमातीच्या भिंतींमधुनी विहर जरा
मायबाप.. मायबाप..

सुखदु:खाचे झाले आता गाव जुने
त्या हसण्या-रडण्यामाधुनी तू बहर जरा
मायबाप.. मायबाप..

या जगण्यातून काढून घे हे जहर जरा
उलट जरासा दु:खाचा हा प्रहर जरा
मायबाप.. मायबाप..

रडता रडता या ओठांवर कधितरी
हसण्याचाही कर जरासा कहर जरा
मायबाप.. मायबाप..

अंगण होईल देव्हार्‍यासम पावन हे
वेलिवरल्या पानाफुलातून डवर जरा
मायबाप.. मायबाप..