राम सर्वांगी सांवळा । हेमअलंकारें पिवळा ।
नाना रत्‍नांचियां किळा । अलंकार शोभतीं ॥१॥

पिवळा मुकुट किरीटी । पिवळें केशर लल्लाटीं ।
पिवळ्या कुंडलांच्या थाटी । पिवळ्या कंठी वनमाळा ॥२॥

पिवळें पदक करभूषणें । बाहुवटीं करकंकणे ।
पिवळ्या मुद्रिकांचे लेणे । पिवळें करीं शरचाप ॥३॥

पिवळा कांसे पितांबर । पिवळया ब्रीदांचा तोडर ।
पिवळ्या घंटांचा गजर । पिवळ्या वाक्या साजती ॥४॥

पिवळा मंडप विस्तीर्ण । पिवळें मध्ये सिंहासन ।
राम सीता लक्ष्मण । दास गुण गातसे ॥५॥