A Non-Profit Non-Commercial Public Service Initiative by Alka Vibhas   
शालू हिरवा पाच नि

शालू हिरवा पाच नि मरवा वेणी तिपेडी घाला
साजणी बाई येणार साजण माझा !
गोर्‍या भाळी चढवा जाळी नवरत्‍नांची माळा
साजणी बाई येणार साजण माझा !

चूलबोळकी इवलीइवली भातुकलीचा खेळ ग
लुटूपुटीच्या संसाराची संपत आली वेळ ग
रेशिमधागे ओढिती मागे व्याकुळ जीव हा झाला

सूर गुंफिते सनई येथे झडे चौघडा दारी
वाजतगाजत मिरवत येईल घोड्यावरुनी स्वारी
मी वरमाला घालीन त्याला मुहूर्त जवळी आला

मंगलवेळी मंगलकाळी डोळा का ग पाणी?
साजण माझा हा पतिराजा मी तर त्याची राणी
अंगावरल्या शेलारीला बांधीन त्याचा शेला
मरवा - सुगंधी पाने असलेली एक वनस्पती.
शेलारी - उंची साडी / शालू.

Please consider the environment before printing.
कागद वाचवा.
कृपया पर्यावरणाचा विचार करा.