A Non-Profit Non-Commercial Public Service Initiative by Alka Vibhas   
तूं माझी माउली (२)

तूं माझी माउली मी वो तुझा तान्हा ।
पाजीं प्रेमपान्हा पांडुरंगे ॥१॥

तूं माझी गाउली मी तुझें वासरूं ।
नको पान्हा चोरूं पांडुरंगे ॥२॥

तूं माझी हरिणी मी तुझें पाडस ।
तोडीं भवपाश पांडुरंगे ॥३॥

तूं माझी पक्षिणी मी तुझें अंडज ।
चारा घालीं मज पांडुरंगे ॥४॥

नामा ह्मणे होसी भक्तीचा वल्लभ ।
मागेंपुढें उभा सांभाळिसी ॥५॥
रचना-संत नामदेव
संगीत - सुधीर फडके
स्वर - सुधीर फडके
चित्रपट- विठ्ठल रखुमाई
गीत प्रकार - चित्रगीत संतवाणी
वल्लभ - पती / प्रिय.