A Non-Profit Non-Commercial Public Service Initiative by Alka Vibhas   
आमुची वसने दे श्रीहरी

झोंबती अंगा जललहरी
आमुची वसने दे श्रीहरी !

पळे पळाली, गेली घटका
पुरे खेळ हा अवखळ, लटका
परत जाऊ दे घरी
आमुची वसने दे श्रीहरी !

जात आमुची अशी लाजरी
क्षणाक्षणाने पदर सावरी
सुवेश असला तरी
आमुची वसने दे श्रीहरी !

जळात बुडले देह तरी हे
उघडेपण मन विसरत नाही
लाज सले अंतरी
आमुची वसने दे श्रीहरी !

किती विनवावे, किती रडावे
असेच वाटे जळी बुडावे
तूच सुबुद्धी धरी
आमुची वसने दे श्रीहरी !
गीत - ग. दि. माडगूळकर
संगीत - स्‍नेहल भाटकर
स्वर- सुमन कल्याणपूर
चित्रपट - अन्‍नपूर्णा
राग / आधार राग - ललत
गीत प्रकार - हे श्यामसुंदर, चित्रगीत
वसन - वस्‍त्र.
सल - टोचणी.

Please consider the environment before printing.
कागद वाचवा.
कृपया पर्यावरणाचा विचार करा.