A Non-Profit Non-Commercial Public Service Initiative by Alka Vibhas   
आवडला मज मनापासुनी

आवडला मज मनापासुनी गडी तो घोड्यावरचा
कराडचा की कोल्हापूरचा, दिसला मोठ्या घरचा

ऐन विसाची असेल उमर दिसे वाईसा मोठा
तंग मलमली कुडता अंगी डोईस हिरवा फेटा
घोड्यावरची मांड पहाता जोर उमगला वरचा

मान उचलुनी वर बघवेना नजर कहारी भारी
नजरानजरी चुकुन होता उगीच हसली स्वारी
बाजाराला जाता जमला शिनवे त्याचा आमचा

नाव न पुशिलं गाव न पुशिलं झाली न बोलाचाली
घडू नये ते घडलं बाई खूण राहिली गाली
दिवसारात्री तसाच दिसतो हले न डोळ्यापुढचा
शिनवे - शिनवा अथवा शिनं हा माणदेशी शब्द आहे. याचा अर्थ जोड किंवा जोडी जमणे. जेव्हा एका उंचीच्या, एका वयाच्या बैलांची जोडी जमते त्यास शिनंची जोडी असं म्हणतात. अशा बैलजोडीवर भार आणि ओढ समान वितरीत होतं.
(भाषातज्ञ डॉ. सयाजीराव मोकाशी यांचे या माहितीसाठी आभार.)

 

  सुधीर फडके, आशा भोसले