A Non-Profit Non-Commercial Public Service Initiative by Alka Vibhas   
अजून नाही जागी राधा

अजून नाही जागी राधा,
अजून नाही जागें गोकुळ;
अशा अवेळीं पैलतिरावर
आज घुमे कां पावा मंजुळ.

मावळतीवर चंद्र केशरी;
पहाटवारा भवती भणभण;
अर्ध्या पाण्यामध्ये उभी ती
तिथेच टाकुन अपुलें तनमन.

विश्वच अवघें ओठां लावुन
कुब्जा प्याली तो मुरलीरव;
डोळ्यांमधले थेंब सुखाचे :
"हें माझ्यास्तव.. हें माझ्यास्तव.."