A Non-Profit Non-Commercial Public Service Initiative by Alka Vibhas   
अजून त्या झुडुपांच्या मागे

अजून त्या झुडुपांच्या मागे
सदाफुली दोघांना हसते
अजून अपुल्या आठवणींनी
शेवंती लजवंती होते

तसे पहाया तुला मला ग
अजून दवबिंदू थरथरतो
अर्ध्यामुर्ध्या कानगुजास्तव
अजून ताठर चंपक झुरतो

अजून गुंगीमधे मोगरा
त्या तसल्या केसांच्या वासे
अजून त्या पात्यांत लव्हाळी
होतच असते अपुले हासे

अजून फिक्कट चंद्राखाली
माझी आशा तरळत आहे
गीतांमधले गरळ झोकुनी
अजून वारा बरळत आहे !
गीत - वसंत बापट
संगीत - दशरथ पुजारी
स्वर- दशरथ पुजारी
राग - यमनकल्याण
गीत प्रकार - भावगीत
गुज - गुप्‍त गोष्ट, कानगोष्ट.
गरल(ळ) - विष.
लव्हाळे - गवत.

Please consider the environment before printing.
कागद वाचवा.
कृपया पर्यावरणाचा विचार करा.