A Non-Profit Non-Commercial Public Service Initiative by Alka Vibhas   
अपर्णा तप करिते काननी

भस्मविलेपित रूप साजिरे आणुनिया चिंतनी
अपर्णा तप करिते काननी !

वैभवभूषित वैकुंठेश्वर
तिच्या पित्याने योजियला वर
भोळा शंकर परि उमेच्या भरलासे लोचनी !

त्रिशूल डमरू पिनाकपाणी
चंद्रकला शिरि सर्प गळ्यातुनि
युगायुगांचा भणंग जोगी तोच आवडे मनी !

कोमल सुंदर हिमनगदुहिता
हिमाचलावर तप आचरिता
आगीमधुनी फूल कोवळे फुलवी रात्रंदिनी !
गीत- शान्‍ता शेळके
संगीत - आनंदघन
स्वर - लता मंगेशकर
चित्रपट- तांबडी माती
गीत प्रकार - चित्रगीत
अपर्णा - पार्वतीचे त्यावेळचे नाव जेव्हा शंकर प्राप्‍तीसाठी तपश्चर्या करताना तिने झाडांची पाने खाणेही सोडले होते.
कानन - अरण्य, जंगल.
दुहिता - कन्या.
पिनाकपाणी - शंकर.