A Non-Profit Non-Commercial Public Service Initiative by Alka Vibhas   
बाई या पावसानं

बाई या पावसानं
लाविली झीम झीम
भिजविलं माळरानं
उदासलं मन
बाई या पावसानं

दिनभर देई ठाणं
रात्रिस बरसून
सकाळिचं लोपविलं
कोवळं ऊन छान
बाई या पावसानं

फुलली ही जाईजुइ
बहरुनी वाया जाई
पारिजातकाची बाई
कशी केली दैन
मातींत पखरण
बाई या पावसानं !

नदीनाले एक झाले
पूर भरूनीया चाले
जिवलग कोठें बाई
पडे अडकून
नच पडे चैन
बाई या पावसानं
गीत- कवी अनिल
संगीत - जी. एन्‌. जोशी
स्वर - पु. ल. देशपांडे
गीत प्रकार - ऋतू बरवा भावगीत
  
टीप -
• काव्य रचना - नागपूर, ऑगस्‍ट १९३२
पखरण - सडा / उधळण.