A Non-Profit Non-Commercial Public Service Initiative by Alka Vibhas   
चला राघवा चला

चला राघवा चला
पहाया जनकाची मिथिला

मिथिलेहुनिही दर्शनीय नृप
राजर्षी तो जनक नराधिप
नराधिपें त्या नगरीमाजीं यज्ञ नवा मांडिला

यज्ञमंडपी सुनाभ कार्मुक
ज्यास पेलता झाला त्र्यंबक
त्र्यंबक देवे त्याच धनूनें त्रिपुरासुर मारिला

शिवधनुतें त्या सदनीं ठेवुन
जनक तयाचें करितो पूजन
पूजनीय त्या विशाल धनुला जगांत नाहीं तुला

देशदेशिंचे नृपती येउन
स्तिमित जाहले धनुष्य पाहुन
पाहतांच तें उचलायाचा मोह तयां जाहला

देव, दैत्य वा सुर, नर, किन्‍नर
उचलुं न शकले त्यास तसूभर
तसूभरी ना सरलपणा त्या चापाचा वांकला

कोण वांकवुन त्याला ओढिल?
प्रत्यंचा त्या धनूस जोडिल?
सोडिल त्यांतुन बाण असा तर कोणी ना जन्मला

उपजत योद्धे तुम्ही धनुर्धर
निजनयनीं तें धनू पहा तर
बघा राघवा, सौमित्री तर औत्सुक्यें दाटला

उत्साहाने निघती मुनिजन
चला संगतीं दोघे आपण
आपण होतां सहप्रवासी भाग्यतरू ये फला
गीत- ग. दि. माडगूळकर
संगीत - सुधीर फडके
स्वराविष्कार - सुधीर फडके
∙ आकाशवाणी प्रथम प्रसारण
( गायकांची नावे कुठल्याही विशिष्ट क्रमाने दिलेली नाहीत. )
राग- बिभास
गीत प्रकार - गीतरामायण राम निरंजन
  
टीप -
• गीतरामायण.
  • प्रथम प्रसारण दिनांक- ३/६/१९५५
  • आकाशवाणीवरील प्रथम प्रसारण स्वर- चंद्रकांत गोखले.
कार्मुक - धनुष्य.
किन्‍नर - उपदेवता, देवलोकींचे गायक.
चाप - धनुष्य.
तुला - उपमा.
नृप - राजा.
नृपति - राजा.
नराधिप - राजा / मुख्य.
प्रत्यंचा - धनुष्याची दोरी.
मिथिला - विदेह देशाची (जनक राजाची) राजधानी.
स्तिमित - आश्चर्य.
सुर - देव.
सौमित्र - लक्ष्मण (सुमित्रेचा पुत्र).

 

  सुधीर फडके
  आकाशवाणी प्रथम प्रसारण