छळतसे काजळ काळी रात
नभी चंद्रमा धवल पौर्णिमा तरीही मी तिमीरात

सूर जुळविले जिथे अंगणी
मधूर छेडिली एक रागिणी
अबोल झाली सतार का रे आज तुझ्या विरहात
छळतसे काजळ काळी रात

प्राणांची तू घालुनी फुंकर
प्रीतिचा फुलविलास अंकुर
अमृतात ही न्हाली लतिका, कोमेजली निमिषात
छळतसे काजळ काळी रात

नको चांदणे नको गंध हा
आर्त स्वरांचा नको छंद हा
एक स्मृती तव त्या स्पर्शांची अमर असो हृदयात
माजू दे काजळ काळी रात