A Non-Profit Non-Commercial Public Service Initiative by Alka Vibhas   
चोच जयाने दिधली बाळा

चोच जयाने दिधली बाळा
घास द्याया विसरलेला
कळुनी येता चूक आपुली
देव नाही जेवलेला

अनंत कोटी जीव जिवांचा
पोशिंदा तो प्रभू एकला
सर्वामुखी तो घास भरविता
असेल शिणला चालुन थकला
भूक आमची मिठी मारता
गहिवरुनी तो व्याकुळलेला

अश्रु ढाळित येता धावत
सीमेवरती दिन मावळला
चंद्रमौळी घर हे आपुले
अंधारातच शोधित आला
मिटल्या नयनी येईल स्वप्‍नी
घास आपणा भरवायाला