देवा मला का दिली बायको अशी?
शिकवून थकलो मी दर दिवशी !

श्रीमंताची लेक आहे आळशी अती
एवढीशी खोली तरी घाण ही किती
पलंगाच्या खाली सदा खेळती घुशी !

उपवास धरी, करी एकादशी
दिसभर पिते लस्सीवरही लस्सी
आणि फराळाने भरी दोन्हीही कुशी !

बॉबीकटवाली माझी राणी असे
हिच्या वागण्याने केले वेडेपिसे
धाकानं मी ओठावरची काढितो मिशी !

सत्यनारायणा तुझी पूजा घातली
हिच्या पुढे पोथी-पुरणेही वाचली
तरी गुलहौशी आहे जशीच्या तशी !