A Non-Profit Non-Commercial Public Service Initiative by Alka Vibhas   
एकट्याने एकटे गर्दीत चालावे

एकट्याने एकटे गर्दीत चालावे
एकट्याने आपल्याशी फक्त बोलावे

थांबते गर्दी फुलांच्या उंबर्‍यापाशी
एकट्याने आतुनी निर्माल्य हुंगावे

दार हे अपुले तिर्‍हाईत होत असे जेव्हा
एकट्याने ओळखावे अन्‌ पुढे जावे

एकट्याला हाक येते रानपक्ष्याची
एकट्याने पाखरू प्राणांत झेलावे

लागते जावेच या अंधारयात्रेला
एकट्याने एकटा अपुला दिवा व्हावे
गीत - मंगेश पाडगांवकर
संगीत - श्रीधर फडके
स्वर- अवधूत गुप्‍ते
अल्बम - संगीत मनमोही रे
गीत प्रकार - भावगीत

Please consider the environment before printing.
कागद वाचवा.
कृपया पर्यावरणाचा विचार करा.