गगनिं उगवला सायंतारा
मंद सुशीतल वाहत वारा

हांक तुझी मज स्पष्ट ऐकुं ये
येइ सखे, ये बैस जवळिं, ये
घाल गळां मम तव कर कोमल
पसरूं दे श्वासाचा परिमल
घेईं मम हृदयांत निवारा
गगनिं उगवला सायंतारा

बैस जवळ ये, बघ ही पश्चिम
कोमल रंगीं खुलली अनुपम
ये नेत्रीं ते घेउं सांठवुनि
गालावरती गाल ठेवुनी
गगनी उगवला सायंतारा
उदासीनता विसर जगाची
तुझाच मी, तूं माझि सदाची
विरलें हृदयांतरिं बघ अंतर
तूं आणिक मी जवळ निरंतर !
गगनिं उगवला सायंतारा