A Non-Profit Non-Commercial Public Service Initiative by Alka Vibhas   
घाल घाल पिंगा वार्‍या

घाल घाल पिंगा वार्‍या, माझ्या परसात
माहेरी जा, सुवासाची कर बरसात !

"सुखी आहे पोर," सांग आईच्या कानात-
"आई, भाऊसाठी परि मन खंतावतं !

विसरली का ग? - भादव्यात वर्स झालं,
माहेरीच्या सुखाला ग मन आचवलं.

फिरुन फिरुन सय येई, जीव वेडावतो
चंद्रकळेचा ग शेव ओलाचिंब होतो !

काळ्या कपिलेची नंदा खोडकर फार
हुंगहुंगूनीया करी कशी ग बेजार !

परसात पारिजातकाचा सडा पडे
कधी फुलं वेचायला नेशील तू गडे !

कपिलेच्या दुधावर मऊ दाट साय
माया माझ्यावर दाट जशी तुझी माय.. !"

आले भरून्‌ डोळे पुन्हा गळा नि दाटला
माउलीच्या भेटीसाठी जीव व्याकूळला !