A Non-Profit Non-Commercial Public Service Initiative by Alka Vibhas   
हा असा चंद्र अशी

हा असा चंद्र.. अशी रात फिरायासाठी !
तूच नाहीस इथे हात धरायासाठी !

चेहरा तो न इथे ही न फुलांची वस्ती !
राहिले कोण आता सांग झुरायासाठी?

कालचे तेच फिके रंग नकोसे झाले
दे तुझे ओठ नवा रंग भरायासाठी !

आडवी एक तिथे भिंत मनाची आली..
दार होतेच कुठे आत शिरायासाठी?

काय आगीत कधी आग जळाली होती?
लोक नेतील मला खोल पुरायासाठी !
गीत - सुरेश भट
संगीत - भीमराव पांचाळे
स्वर- भीमराव पांचाळे
अल्बम - दु:खाचे झाले गाणे..
गीत प्रकार - कविता, शब्दशारदेचे चांदणे

 

Print option will come back soon