A Non-Profit Non-Commercial Public Service Initiative by Alka Vibhas   
हलके हलके जोजवा

हलके हलके जोजवा बाळाचा पाळणा
पाळण्याच्या मधोमध फिरतो खेळणा

सजली ग मऊमऊ मखमालीची शैय्या
निजली ग बाळाची गोरी गोरी काया
बाळ रुपडे देवाचे भुलविते लोचना

खेळवा लाडानं गोपा बायांनो
गोविंद घ्या, गोपाळ घ्या, म्हणा सयांनो
नाव ठेवा नवसाचा हा राजा देखणा

कुर्रर्र करा कानात हळूच भेटा ग
बारशाचा सोहळा घुगर्‍या वाटा ग
आज बाई इंद्राचा दरबार ठेंगणा