A Non-Profit Non-Commercial Public Service Initiative by Alka Vibhas   
हे जीवन सुंदर आहे

हे जीवन सुंदर आहे !

नितळ निळाई आकाशाची अन्‌ क्षितिजाची लाली
दंवात भिजल्या वाटेवरती किरणांची रांगोळी

अहो ! आता विसरा हे सगळं
इथं इमारतींच्या जंगलातला वनवास
त्यातून दिसणारं टीचभर आकाश
आणि गर्दीत घुसमटलेले रस्त्यांचे श्वास

कोठेही जा अवतीभवती निसर्ग एकच आहे
हे जीवन सुंदर आहे !

पानांमधली सळसळ हिरवी अन्‌ किलबिल पक्षांची
झुळझुळ पाणी वेळुमधुनी खुळी शीळ वार्‍याची

इथं गाणं लोकलचं !
पाणी तुंबलेल्या नळाचं !
आणि वारं डोक्यावर गरगरणार्‍या पंख्यांचं !

इथेतिथे संगीत अनामिक एकच घुमते आहे
हे जीवन सुंदर आहे !

पाऊस झिमझिमणारा आणि पाऊस कोसळणारा
टपटप पागोळ्यांतून अपुल्या ओंजळीत येणारा

पाऊस म्हणजे रेनकोटचं ओझं !
कपड्यांचा सत्यनाश !
आणि सर्दीला निमंत्रण !

जगण्यावरचे प्रेम जणू हे धुंद बरसते आहे
हे जीवन सुंदर आहे !
पागोळी - छपरावरून पडणारी पाण्याची धार.
वेळू - बांबू.

 

  आशा भोसले, रवींद्र साठे, अंजली मराठे