A Non-Profit Non-Commercial Public Service Initiative by Alka Vibhas   
कधी मी पाहिन ती पाऊले

सामर्थ्याहुन समर्थ निष्ठा, अशक्य तिजसी काय?
पडे अहल्या शिळा त्यास्थळी येतिल प्रभुचे पाय !

कधी मी पाहिन ती पाऊले?

पाहिन केव्हा तो सोहळा
प्रभुचरणांचा स्पर्श कपाळा
आनंदाश्रू झरतिल डोळा
भाग्यच माझे दिसेल मजसी मूर्त उभे ठाकले !

रणांत जिंकुन कौरवसेना
यशसिद्धीच्या करित गर्जना
अभये अर्पित साधुसज्जना
पाच प्राणसे येतिल पांडव विजयाने न्हाले !

मारून रावण कपटी कामी
अशोकवनि या येतील स्वामी
वाहणार हे पदी प्राण मी
भेटीसाठी अशा अलौकिक कालचक्र थांबले !

देवाहुनहि समर्थ भक्ती
स्वरांत माझ्या अमोघ शक्ती
सुफलित व्हाया माझी उक्ती
पंचकन्यका अर्पण करिती पुण्य मला आपले
गीत- ग. दि. माडगूळकर
संगीत - सुधीर फडके
स्वर - आशा भोसले
चित्रपट- सुवासिनी
गीत प्रकार - चित्रगीत
अहल्या - ब्रह्मदेवाची मानसकन्या. गौतम ऋषींची पत्‍नी. त्यांच्या शापाने ती शिळा झाली होती. रामाने सीताविवाहाला जाताना हिचा उद्धार केला.
उक्ती - बोलणे, भाषण, वाक्य.
ठाकणे, ठाके - थांबणे / स्थिर होणे.

 

This 👇 player works on all android and iOS devices also
  आशा भोसले